പുകവലി നിര്ത്താന്

ഡോ. വി. ജയറാം
എം. ബി. ബി. എസ്, എം.ഡി (ജന.
മെഡിസിന്), ഡി.എം (കാര്ഡിയോ)
അസോസിയേറ്റ് പ്രഫസ്സര്
കാര്ഡിയോളജി
മെഡിക്കല് കോളേജ്, ആലപ്പുഴ.

ഒരു വര്ഷം ഏകദേശം 50
ലക്ഷംപേരുടെ മരണത്തിന് പുകയില
ഉപയോഗം ഇടയാക്കുന്നു എന്നാണ്
ലോകാരോഗ്യസംഘടനയുടെ
കണക്കുകള് സൂചിപ്പിക്കുന്നത്. ഇതില്
നാലില് ഒരാള് ഇന്ത്യക്കാരനാണ്.
പുകയില മൂലമുള്ള
മരണത്തിന്റെ ഏതാണ്ട് 40
ശതമാനവും ഹൃദ്രോഗം മൂലമാണ്.

പുകവലിയെപ്പോലെ, ഒരു
പക്ഷെ അതിലധികവും മാരകമാണ്
പുകയില മുറുക്ക്, പൊടിവലി തുടങ്ങിയ
മറ്റുപുകയില
ഉല്പ്പന്നങ്ങളുടെ ഉപയോഗം.
പുകവലിയിലെ പുക ഇതില്
ഇല്ലെങ്കിലും ഹൃദ്രോഗത്തിന്
ഹൃദ്രോഗത്തിന്
പുറമെ വായിലെ ക്യാന്സര്,
കവിള്വാര്പ്പ് തുടങ്ങിയ
അസുഖങ്ങള്ക്കും ഇവ കാരണമാകുന്നു.
ഇന്ത്യയില് ഏകദേശം 40
ശതമാനം പുകയില
ഉപയോഗവും മുറുക്ക്,
പൊടിവലി തുടങ്ങിയ
മാര്ഗ്ഗങ്ങളിലൂടെയാണ്.

നിഷ്ക്രിയ പുകവലി

പുകവലിക്കുന്നവര് വലിച്ചു
പുറത്തുവിടുന്ന പുക
പുകവലിക്കാത്തവര്
ശ്വസിക്കുന്നതിനെയാണ് നിഷ്ക്രിയ
പുകവലി (Passive Smoking) എന്ന്
വിശേഷിപ്പിക്കുന്നത്.
പുകവലിക്കാത്തവര്ക്ക്,
പ്രത്യേകിച്ച്
സ്ത്രീകള്ക്കും കുട്ടികള്ക്കും ഈ
നിഷ്ക്രിയ പുകവലി പുകയില
ജന്യരോഗങ്ങള് സമ്മാനിക്കുന്നു.
തുടര്ച്ചയായി പുകവലിക്കുന്നവരുടെ (
ചെയിന് സ്മോക്കര് ) കൂടെ ഒരു
മുറിയില് ഒരു മണിക്കൂര് ഇരുന്നാല് 10
സിഗററ്റുവലിച്ച ദോഷമാണ്
ശരീരത്തിന് ഉണ്ടാകുന്നത്. താങ്കള്
പുകവലിക്കുന്ന സമയത്ത്
ഗര്ഭിണിയായ ഭാര്യ
അടുത്തുണ്ടെങ്കില് ഒരു
കാര്യം തീര്ച്ചയാണ്.
ഗര്ഭസ്ഥശിശുവിനും പിതാവിന്റെ
പുകവലിയുടെ ദുരിതം
അനുഭവിക്കേണ്ടിവരും.

പുകവലി നിര്ത്താന്

പുകവലിയും മുറുക്കുമൊക്കെ നിര്ത്താന്
പലവട്ടം നിങ്ങള് ശ്രമിച്ചിട്ടില്ലേ?
പുകയില
ഉപയോഗത്തിന്റെ ഭവിഷ്യത്തുകള്
മനസ്സിലാക്കി തീരുമാനമെടുത്ത് മൂന്ന്
നാലു ദിവസം പിടിച്ചു നിന്നു.
പക്ഷെ അഞ്ചാം ദിവസം വീണ്ടും
തുടങ്ങി. എന്തുകൊണ്ടാണ്
ഇങ്ങനെ സംഭവിക്കുന്നത്?
പുകയിലയിലെ ആസക്തിക്ക്
കാരണക്കാരനായ നിക്കോട്ടിന്
ആണ് ഇവിടെ പ്രധാന വില്ലന്.
പുകവലിക്കുമ്പോള് രക്തത്തില്
ലയിച്ച് ഏതാണ്ട് 8
സെക്കന്റുകള്ക്കുള്ളില് തലച്ചോറില്
എത്തുന്ന നിക്കോട്ടിന് ഒരു ചെറിയ
'കിക്ക്'
നല്കുന്നതോടൊപ്പം ക്രമേണ കടുത്ത
ആസക്തിക്ക് കാരണമാകുന്നു. പിന്നീട്
രക്തത്തില് ഒരു നിശ്ചിത അളവ്
നിക്കോട്ടിന് ഇല്ലാതെ വന്നാല്
വല്ലാത്ത അസ്വസ്ഥതകളും ദേഷ്യം,
ഉന്മേഷക്കുറവ്
മുതലായവയും അനുഭവപ്പെടും.
അപ്പോള്
വീണ്ടും പുകവലിച്ച്പോകുന്നത്
സ്വാഭാവികം മാത്രം.
നിക്കോട്ടിന് ആണ് വില്ലന് എന്ന്
കേട്ട് ആശ്വസിക്കേണ്ട.
കാരണം നിങ്ങളുടെ ഉറച്ച
തീരുമാനം തന്നെയാണ്
പുകവലി നിര്ത്തുന്നതിന് മുഖ്യം. ഈ
കാര്യത്തില്
നിങ്ങളെ സഹായിക്കുവാന്
നിങ്ങളുടെ ഡോക്ടര്ക്ക് കഴിയും.
പുകവലി ശീലം ഒഴിവാക്കുവാന്
സഹായിക്കുന്ന ബ്യൂപ്രോപിയോണ്
(Bupropion), വാറെനിസ്ളിന് (Chantix),
തുടങ്ങിയ നൂതന മരുന്നുകളും ഇന്ന്
വിപണിയില് ലഭ്യമാണ്.
പലര്ക്കും പുകവലി നിര്ത്തുവാന്
വേണ്ടിയുള്ള മരുന്നുകള്
കുറച്ചുകാലത്തേക്ക്
ഉപയോഗിക്കേണ്ടി വന്നേക്കാം.
ഇതിനോടൊപ്പം താഴെ പറയുന്ന
ശീലങ്ങള് കൂടി മനസ്സില്
ഉറപ്പിച്ചാല്
പുകവലി ശീലം പാടെ ഉപേക്ഷിക്കുവാന്
സാധിക്കും.
1. പുകവലിയുടെ നൈമിഷിക
സുഖത്തെക്കാള് പ്രധാനം എനിക്ക്
എന്റെയും വീട്ടുകാരുടേയും
ആരോഗ്യമാണ്.

2. പുകവലി നിര്ത്തുവാനുള്ള
തീരുമാനം സുഹൃത്തുക്കളെ അറിയിക്കുക.
അവര്ക്ക് നിങ്ങളെ സഹായിക്കുവാന്
കഴിഞ്ഞേക്കും.

3. പുകവലി ശീലം ഉപേക്ഷിച്ച്
കഴിയുമ്പോള് ലഭിക്കുന്ന
അധികസമയം ചെലവഴിക്കാന്
സഹായകമായ ചില താല്പ്പര്യങ്ങള്
കണ്ടെത്തി വളര്ത്തുക.

4. പുകവലിക്കണമെന്ന് ശക്തമായ
ആഗ്രഹം തോന്നുമ്പോള് ഒരു
മിഠായി വായിലിട്ട് നുണയുക.

5.കഴിവതും എന്തെങ്കിലും ജോലികളില്
വ്യാപൃതനായിരിക്കുവാന് ശ്രമിക്കുക.

6. പുകവലി നിര്ത്തിയ
സുഹൃത്തുക്കളുമായി അനുഭവങ്ങള്
പങ്കുവെക്കുക. മറ്റുള്ളവരെ പുകയില
വിമുക്തിക്ക് പ്രേരിപ്പിക്കുക.